¿Qué ye Arast? (n'ara)

>> Arast ye o punto de trobada entre os chobens nazionalistas d’Aragón e Asturies. Un puesto que ha de fer serbir-ne ta conoxer os nuestros puntos comuns en o pasato y en o presén. Un puesto ta luitar de conchunta per o esbenidero d’os nuestros Pueblos.

Aragón e Asturies, nazions xublidatas, han enreligato ... a partir d’as luitas sozials d’os suyos abitadors. O desconchuntamiento d’a autibidat menera (Cuencas meneras aragonesas e asturianas); a manca de ofizialidat de l’aragonés y l’asturianu (unicas luengas que no en tien ixe estatus en o Estato), asinas como d’o catalán d’Aragón e d’o galego-asturianu d’o Nabia-Eo, en confrontanza con amplos mobimientos de rebindicazión luengüistica; as clases puliticas d’os nuestros países sin capazidat ta rebindicar un menimo de autogubierno e de dinnidat enta os nuestros territorios e o suyo patrimonio ecoloxico e cultural, como se ye contrimostrando en os bazibos atrapazamientos estatutarios que i semos sofrindo; a inecsistén reconoxedura á lo nuestro dreito á la autodeterminazión, que embursa con a ecsistenzia de mobimientos nazionalistas emerchens en os dos países (con retes culturals, sozials, d’ozio...); a urbanizazión y l’estricallamiento ecoloxico d’os nuestros paisaches naturals (Pirineo Aragonés, Picos d’Uropa e costa asturiana) per os intreseses economicos, puliticos e interpresarials; a emigrazión d’os chobens aragoneses e asturianos y os abusos sozio-economicos d’a economía neoliberal son belunas d’as carauteristicas comuns d’os nuestros países.

Chobenalla e MIAS >> han esbelluzato una demba común ta fer més esclateras istas reyalidaz, proposando aizions de conchunta debán d’ellas. Como soluzions, Chobenalla e MIAS >> apostemos por a independenzia e o sozialismo, asinas como per l’ecoloxismo, o feminismo, l’entrenazionalismo e as retes de mobimientos sozials. Perque a unica traza d’autuar contra o nazionalismo español e o neoliberalismo autual ye amanar longarias entre os pueblos e nazions que rebindican a suya soberanía sozial e nazional. Perque os chobens aragoneses e asturianos han de eslexir con libertá cómo deseyan vivir e perque l’esbenidero ye de nusatros e d’os nuestros pueblos.

¡Entalto Aragón Libre! ¡Puxa Asturies Llibre!