¿Qué ye Arast? (n'ast)

Arast ye un sitiu onde aconceyen la mocedá nacionalista d’Aragón y Asturies. Un llugar que tien de valir pa conocer los nuesos finxos comunes nel pasáu y nel presente. Un llugar pa lluchar en comuña pol futuru de los nuesos Pueblos.

Aragón y Asturies, naciones escaecíes, xuncieron los sos destinos dende les lluches sociales de les y los sos habitantes. La desarticulación de l’actividá minero (Cuenques mineres aragoneses y asturianes); la falta d’oficialidá del aragonés y l’asturianu (úniques llingües ensin esi estatus nel Estáu), asina como del catalá d’Aragón y el gallego-asturiano del Navia-Eo, en griesca con amplios movimientos de vindicación llingüística; les clases polítiques de los nuesos países, incapaces d’algamar un mínimu d’autogobiernu y dignidá pa colos nuesos territorios y el so patrimonio ecolóxicu y cultural, como tan amosando nes indignes reformes estatutaries que tamos careciendo; l’inesistente reconocimientu al nuesu drechu a l’autodetermín, que choca cola esistencia de movimientos nacionalistes xorreciendo en dambos países (contestos culturales, sociales, d’ociu…); la urbanización y estroza ecolóxica de los nuesos paisaxes naturales (Pirinéu Aragonés, Cordillera Cantábrica y costa asturiana) polos intereses económicos, políticos y empresariales; la emigración de la mocedá asturiano y aragonés y los abusos socio-económicos de la economía neolliberal son dalgunes de les carauterístiques comunes de los nuesos países.

Chobenalla y mias>> desendolcaron un espaciu común pa facer más visibles estes realidaes, proponiendo aiciones conxuntes énte elles. Chobenalla y mias>>, como igua, apostamos pola independencia y el socialismu, asina como pol ecoloxismu, el feminismu, l’internacionalismu y el sofitu a les redes de movimientos sociales. Porque l’únicu mou d’afechar el nacionalismu español y el neolliberalismu qu’anguaño carecemos ye averar les distancies ente los pueblos y naciones que reivindiquen la so soberanía social y nacional. Porque la mocedá aragonés y asturiano tien de decidir llibremente cómo-yos pruye vivir y porque’l futuru ye de nós y de los nuesos Pueblos.

¡Entalto Aragón Libre! ¡Puxa Asturies Llibre!