Aragón y Asturies contra el fascismu y el militarismu

>> El conxuntu del Estáu español y, dramáticamente, Asturies y Aragón tán viviendo un resurdir del fascismu, nazismu y militarismu. Afalaos pola derecha política y social, al igual qu’amplios sectores del centru izquierda, les nueses cais vuelven a vivir la presencia d’actos y propaganda xenófobo y racista. Afortunadamente, estes aiciones cuntaren con una inmediata y amplia respuesta ciudadana, como se vió na multitudinaria manifestación antifascista (con más de 5000 asistentes) que, convocada pola Plataforma Antifascista, tuvo llugar en Zaragoza.

Dende Chobenalla y Mias>> camentámonos que’l militarismu que’l centru izquierda y la derecha n’Asturies y n’Aragón abracen val de base ideolóxica (y de coartada) a la xenofobia y intolerancia fascista. Agresiones neonazis en Uviéu Avilés, Zaragoza y Cangues, carteles y adhesivos d’organizaciones d’extrema derecha qu’aguiyen a actuar contra los inmigrantes de los nuesos territorios o concentraciones de colectivos fascistes y d’extrema derecha son fechos énte los qu’hemos actuar con toles nueses fuercies. Pero, más allá, la retulación fascista de les nueses cais, la ilusión énte un posible exércitu européu, los desfiles militares, les bases, instalaciones y academies militares en Zaragoza, Calatayú, Chaca, Bardenas (col campu de tiru con fueu real más grande d’Europa), o Noreña (Asturies), la cesión de 60000 m2 de terreno en Valdespartera a la Guardia Civi pol Conceyu de Zaragoza pa construir un centru loxísticu de misiones nel esterior, l’aplausu a la propuesta (de Zapatero y Alonso, col sofitu del PP y PSOE aragonés) de convertir Zaragoza en sé del futuru centru de mando y control del sistema de vixilancia del terrenu (AGS)) de la OTAN –baxo la escusa de la creación d’empléu-, la próxima unidá militar de Chaca los “Battle Group” del futuru exércitu européu –con un continxente de más de 1500 militares de diversos países- … tán estrechamente relacionaos col rearmamientu del fascismu no nuesos países. Y ye preciso recordar qu’estos actos tán promovíos por políticos d’una amplia gama ideolóxica.

Los nuesos planteamientos pacifistes, tolerantes y interculturales faennos refugar cualquier forma de violencia. Sicasí, atacar la violencia fascista, nesti casu, obliga a acudir a les causes que lo xeneren. Y oblíganos a señalar a aquellos que promueven l’odiu ente cultures, naciones o persones. Pero tamién a los que fomenten una cultura militar na sociedá. Prevenir la violencia implica prevenir del fascismu y el militarismu.

D’igual miente, nun podemos obviar que los nuesos posicionamientos favorables a la llibertá de pueblos y persones pa escoyer llibremente’l so futuru, asina como pa vivir en situación d’igualdá col restu de la ciudadanía, asítianos nel puntu de mira d’estos colectivos. Ye más, el principal oxetivu del fascismu nesti Estáu ye l’acabar colos nacionalismos periféricos y el caltener la unidá nacional. Les elites militares refuercien esti discursu y inter-relacionense con él, como viemos agora poco coles sos amenaces d’actuar pola fuercia (o dar un golpe d’Estáu) énte l’Estatut de Catalunya. En cualquier casu, ye un mesmu bloque iguáu por cuerpos militares (qu’interfieren políticamente), ideólogos políticos (que desenvuelven discursos xenófobos y intolerantes) y militancia que lleva a cabo actos violentos (n’abondos casos, profesionales del exércitu o militantes d’esos partíos) cola condescendencia de los anteriores.

Chobenalla y Mias>> camentámonos que ye la nuesa ideoloxía política y, más allá, la ideoloxía de les clases populares d’emancipación social y nacional lo que resulta verdaderamente inquietante pa estos grupos fascistas. De facto, cualquier intentu de reformulación del Estáu culmina con una cohesión ensin precedentes ente tolos grupos políticos (como se vio na reforma de los estatutos d’Aragón, Catalunya y País Valencià). Tampoco nun hemos d’escaecer la función estratéxica que caltuvo tradicionalmente l’exércitu y la policía na represión de los movimientos sociales y nacionales nos nuesos países. Por ello, lloñe de ser una institución del Pueblu, ye un órganu de represión y control de persones y ideoloxíes nos nuesos países.

Por too ello, esiximos la retirada de cualquier símbolu fascista de les nueses ciudaes y pueblos, asina como’l paulatinu cierre d’academies, instalaciones y bases militares qu’incrementen la extensión y fuerza del exércitu nos nuesos países. D’igual miente, reclamamos la prohibición d’actos y encuentros d’ideoloxía xenófoba, con una función que ye la de cohesionar fuercies qu’actúen política y socialmente de forma nazi, fascista o racista. Nesa llínia, Chobenalla y mias>> van emprender campañes n’Asturies y Aragón pa concenciar a les moces y mozos de los nuesos paises alrodiu d’estes cuestiones.