Selezions Nazionals d’Asturies e Aragón ¡Ofizialidá YA!

>> Dende Mocedá d’Izquierda Asturiana (mias>>) e Chobenalla Aragonesista, sapemos que en l’autualidá, en a era d’a comunicazión e d’as nuebas teunolochías á ran global, ye de dar a capazidá que en tién os ebentos esportibos, espezialmén á ran de collas nazionals, ta reflexar os sentimientos identitarios de cada pueblo, pos ripresentan a unidá masima almenistratiba e territorial que le’n referenzia á una comunidá de presonas.

Sin dembargo, en o Estato español, iste chuego d’identidá chenera un fenomeno negatibo, como se conoxen poquez en o mundo, an, per exemplo, Asturies e Aragón i son ripresentatas en o esportibo per as selezions esportibas asolutas españolas anque sigan, los de nusatros, países con identidá asolutamén definita, y no solo que ixo, dotatos d’una ambiesta esportiba e competitiba desembolicata e capable ta ripresentar en toz os aspeutos y en esclusiba á la poblazión asturiana e aragonesa, o mesmo que suzede en o repui d’as nazions d’o Estato.

A esplicazión á iste feito se concreta en que o control cultural e ideolochico recaye en o propio Estato, en os suyos meyos de comunicazión e organos encargatos, en iste caso, d’o esportibo, que dende a zentralidá, dizen prebar de ripresentar, sin de suarde, a dibersa plurinazionalidá d’o Estato.

Asinas, dende Chobenalla e mias>> beyemos como l’apolochía esportiva enta la selezión española de fútbol, luen d’alazetar-ne en un intrés esportibo, ye tan solo que propaganda pulitica á lo serbizio d’os ideyarios nazionalistas españols. Antimás, en o que pertoca á la desziplina federatiba, a unica posibilidá que en tién os esportistas d’os nuestros territorios ta partezipar en competizions entrenazionals ye fer-lo dende aintro d’as selezions españolas, estando asinas moñacas á lo serbizio d’a enstrumentalizazión identitaria que sofren per parti d’o més ranzio zentralismo español. Isto se compreba, espezialmén, en as autibidaz d’a selezión española de fútbol, an con o zinico argumento de fundo de que “l’esporte educa, l’esporte precura...” se reparte material “royo-amarillenco” subenzionato entre atros, per asturianos, aragoneses, bascos, catalanes, etz... con o fin d’amparar un sentimiento e una reyalidá inecsistentes.

Per atro costau, sin dexar de apostar per as selezions nazionals, dende a chobentú nazionalista d’Aragón e Asturies, queremos destacar o nuestro refuse á os grans ebentos esportibo-publizitarios, como lo que suposa iste Mundial de Fútbol de Chermania 2006, qu’amostra una ambiesta d’esbelluzamiento totalmente insostenible, en a mayoría d’as ocasions antiecoloxico, e nulo en o terreno sozial (construzión de nuebas instalazions innesezarias, xublido d’as nesezidaz sozials d’a poblazión), ta que mas que se benefizien os zerclos interpresarials d’a soziedá (publizitazión de interpresas, construtoras...).

Per consiguién, dende Mocedá d’Izquierda Asturiana (mias>>) e Chobenalla Aragonesista desiximos urchentemén una rebisión d’o modelo de seleziones esportibas nazionals an le’n de plena autonomía á las que lo demanden, ta que as suyas partezipazions entrenazionals pasen á estar de ofiziosas á ofizials, tan ofizials e reconoxitas como tién que estar-ie as suyas identidaz, as nuestras identidaz asturiana e aragonesa respeutibamén. Antimás, no podemos deixar á un costato a nesezidá de que se reconoxca o dreito d’as e d’os esportistas á no estar aforzatas e aforzatos á partezipar con una selezión que no sienten como propia á la ora de prener parti en una competizión de carauter entrenazional, feito que güei en diya carexen muitos profesionals d’o esporte.

Ta rematar, queremos remerar que ta tener una selezión nazional propia no ye nesezario constituyir un Estato independién, como contrimuestran en o fútbol exemplos tan siñalatos como Escozia, Gales, Mazedonia, Palestina, Puerto Rico u las Islas Faeroe.

Perque ya bi ye bien d’emplegar l’esporte como arma ta refirmar identidaz sin de sentir popular; perque en muitos atros esportes muitas nazions sin Estato partezipan en competizions entrenazionals; perque bi ha que rispetar a boluntá d’as nazions que quieran contar con una selezión propia; perque se guarenzien os dreitos endibiduals e coletibos d’os propios esportistas:

OFIZIALIDÁ D’AS SELEZIONS NAZIONALS ARAGONESA E ASTURIANA ¡YA!