Seleiciones nacionales d’Asturies y Aragón ¡OFICIALIDÁ YÁ!

>> Dende Mocedá d’Izquierda Asturiana (mias>>) y Chobenalla Aragonesista, sabemos que nesti tiempu, na era de la comunicación y les nueves tecnoloxíes a nivel global, ye induldable la capacidá que tienen los eventos deportivos, sobremanera a nivel de combinaos nacionales, pa espeyar los sentimientos identitarios de cada pueblu, darréu de que representen la unidá máxima alministrativa y territorial que se-y asigna a una comunidá d’habitantes.

Sicasí, nel Estáu español, esti xuegu d’identidaes da llugar a un fenómenu anómalu, como se conocen pocos en mundu, onde, por exemplu, Asturies y Aragón tan representaes no deportivo poles seleiciones deportives absolutes españoles magar que sían, los nuesos, países con identidá absolutamente definida, y non sólo eso, dotaos d'un sistema deportivu y competitivu desenvueltu y capacitáu pa representar en tolos aspectos y n'esclusiva a la población asturiano y aragonés, lo mesmo qu’asocede nel restu de les naciones del estáu.

La esplicación a esti fechu concrétase en que'l control cultural y ideolóxicu recái nel propiu estáu, nos sos medios de comunicación y muérganos encargaos, nesti casu, de lo deportivo, que dende la centralidá, dicen tentar de representar, ensin suerte, la diversidá plurinacional del estáu.

Asina, dende Chobenalla y mias>>, vemos cómo l’apoloxía deportiva p’hacia la seleición española de fútbol, lloñe de basase nún interés deportivu, ye namás propaganda política al serviciu de los idearios nacionalistes españoles. Amás, no que cinca a la disciplina federativa, la única posibilidá que tienen los deportistes de los nuesos territorios pa participar en competiciones internacionales ye facelo dende dientro de les seleiciones españoles, siendo asina marionetes al serviciu de la instrumentalización identitaria que carecen per parte del más ranciu centralismu español. Esto constátase, especialmente, nes actividaes de la seleición española de fútbol, onde col cínicu argumentu de fondu de que “el deporte educa, el deporte previén…” espárdese material “rojigualdo” sufragao, ente otros, por asturianos, aragoneses, vascos, catalanes, etc…col envís d’afitar un sentimientu y una realidá inesistentes.

Per otru llau, ensin dexar d’apostar poles seleiciones nacionales, dende la mocedá nacionalista d’Aragón y Asturies, queremos sorrayar la nuesa refuga a los grandes eventos deportivo-publicitarios, como supón esti Mundial de Fútbol d’Alemaña 2006, qu’amuesen un modelu de desendolcu insostenible dafechu, na mayoría de les ocasiones antiecolóxicu, y nulu nel tarrén social (construcción de nueves instalaciones innecesaries, escaezu de les necesidaes sociales de la población), pa que namás medren los círculos empresariales de la sociedá (publicitación d’empreses, constructores...).

Poro, dende Mocedá d’Izquierda Asturiana (Mias>>) y Chobenalla Aragonesista desiximos urxentemente una revisión del modelu de seleiciones deportives nacionales onde se-yos dea plena autonomía a les que lo demanden, pa que les sos participaciones internacionales pasen a ser d'oficioses a oficiales, tan oficiales y reconocíes como han de ser les sos identidaes, les nueses identidaes asturiana y aragonesa respeutivamente. Amás, nun podemos dexar de llau la necesidá de que se reconoza’l drechu de les y los deportistes a nun ser obligaes y obligaos a participar con una seleición que nun sienten como propia a la hora de tomar parte núna competición de calter internacional, fechu qu’anguaño carecen bien de profesionales del deporte.

Pa finar, queremos recordar que pa tener seleición nacional propia nun ye necesario costituyir un Estáu independiente, como amuesen nel fútbol exemplos tan señalaos como Escocia, Gales, Macedonia, Palestina, Puerto Rico o les Islles Faeroe.

Porque yá ta bien d’emplegar el deporte como arma p’afitar identidaes ensin sentir popular; porque en munchos otros deportes munches naciones ensin Estáu participen en competiciones internacionales; porque hai que respetar la voluntá de les naciones que quieran cuntar con una seleición propia; porque se garanticen los drechos individuales y coleutivos de los propios deportistes:

OFICIALIDÁ DE LES SELEICIONES NACIONALES ARAGONESA Y ASTURIANA ¡YÁ!